Byaktul hi : SaWaD AL-AzHaRy & Tirmidhi
Panawhêd sin Assalaf Assâlih (Ahlul Hadêth) ha Asma’ [ngân] iban Sifat sin Allâhu ta’âla.
Mayta’ kiyagausan sin manga Nasrâni siyumba in hambu’uk tau nalansang salta’ miyatay pa ha ta’as sin krus? Mayta’ kiyagausan sin manga Yahûdi sifatun in Tuhan sin sifat kamiskin? Mayta’ kiyagausan sin kaybanan mânusiya’ sumbahun in barhala’ amun hînang-hinang sadja sin duwa lima nila? Mayta’ in pangahagad sin kaybanan mânusiya’ wayru’un nagpapanjari? Mayta’ baha ?
Hangkan siyumba sin manga kuffâr in manga susubahun nila, ha sabab sin ka’awam [jahl], di’ nila kaingatan bang unu in Sifat sin Tuhan amun mapatut sumbahun, iban unu in bukun,
Hangkansa in manga ‘Ulama’ sin Ahlus Sunna wal Jamâ’a, way nagbati’ la’ul, piyarulil nila iban dîhilan halga’ in paglilay sin Aqêda sin Assalaf As-sâlih ha sabab sin ngân [Asma’] iban Sifat sin Allâhu ta’âla.
Sabab in pangingat pa Allâh, amuyan in kari’asali sin pag-âgama, iban amu nayan in rukun mapagun sin Tawhêd, iban bunnal tu’ud amu nayan in wâjib, naka’una dayng ha katan kawâjiban, damikkiyan piyalda’akan sin Allâh ha katân nara’ak [ mukallaf ] [jin iban mânusiya’]
.Dayng ha sabab niya ini [ Tawhêd ] nagda’ak in Allâh ha manga karasulan niya iban kanabihan, ha supâya kaingatan sin manga nara’ak [ mukallaf ] bang mayta’ sila piyapanjari sin Allâhu ta’âla.
Mayta’ piyapanjari sin Allâh in jin iban mânusiya’? ha supâya sila magtag-êpun pa katunggal sin Allâhu ta’âla,
In dalêl:
biya’ na sin wasîhat sin Nabi (sallallahu alayhi wa sallam) kan Mu’az (radiyallâhu anhu) ha waktu niya diya’ak manawag-tawag ha manga tau yaman, in sabda sin Nabi(sallallâhu alayhi wa sallam)kan Mu’az { in manga tau datungan mu yan manga ahlul kitab [yahûdi iban Nasrâni]. In subay pa’unahun mu hipahâti kanila amuna in subay sila magtag-êpun tunggal pa Allâh, apabila nanayma’i na sila sin yan, na pahatiha sila sin piyalda’akan sin Allâh in tumunay sila sin sambahayang lima waktu sakahaba’ adlaw iban dûm...}
Nagparman in Allâhu ta’âla { bunnal tu’ud, wala’ ku piyapanjari in manga jin iban manga mânusiya’ malayngkan tuput magtag-êpun kâku’} Al-dhâriyat:56
Hâtiniya in pangadji’ tawhêd, amu nayan in sahalga’ halga’ pangadji’, sabab amu yan in pangadji’ hika ingat mu bang unu in manga Sifat sin Tuhan mu, apabila mu kiya ingatan na in sifat sin Tuhan mu, na sumûng na in lasa mu Kaniya, apabila in ka’awnan mu nanghimunnâkun na salta’ malasa na Kaniya, kasihun nakaw sin Allâhu ta’âla, apabila kaw kiyakasihan na sin Allâh, Sulga’ na in datungan mu...
Mura murahan amuyan in datungan sin kitaniyu katân...amên.
Laung hi Shaikh Fawzy As-Sa’êd ( Hafidhahullah ) : bang ha aku’, wayru’un na lumabi iban dumayaw dayng ha Asma’ was-Sifat, bang hipang da’wa ha bukun muslim. pasal mayta’? sabab, apabila kiya ingatan na sin tau in Sifat sin Allâhu ta’âla, manghimunnâkun na siya sin in siyusumba niya bukun Tuhan sabunnal, adâpun in Tuhan sabunnal, tuput Allâhu ta’âla.
Sumagawa’!, biyaddi’in in hika ingat ta bang unu namayan in manga kasifat sifatan sin Tuhan mahâmulliya, amun mapatut kaniya, iban unu namayan in manga sifat bukun mapatut?
In sambung ha pangasubu ini: adâpun in manga kasifat sifatan sin Tuhan yan lîmpal halawm sin Qur’an iban na bangkil ha Hadêth sahêh sin panghu’ natu’ kanung nungan Muhammad (alayhis salâtu wassalam).
Amurayan in dân, wayru’un dân duga’ing, ha supâya kaingatan ta bang unu namayan in manga kasifat sifatan tumûp ha Allâhu ta’âla iban unu namayan isab in di’ tumûp ha Allâhu ta’âla.
Mayta’? Sabab in manga sifat sin Allâhu ta’âla [ Ghayb ], di’ abutan sin akkal pikilan sin mânusiya’, salta’ wayru’un naka kita’ kaniya.
Amurakuman nagbibidda’ bidda’ in dâhan iban bawgbug sin manga tau ha tungud sin Al-Asma’ was Sifat.
Awn dayng ha manga kiya anughara’an sin Allâhu ta’âla, nakabatuk pa dân mabuntul, damikkiyan awn daisab wala’ naka batuk, adâpun in kaibanan namawgbug ha dâhan sin Assalaf assâslih,( Qur’an iban Hadêth ) in dalêl piyangamdusan, bunnal tu’ud sila na ini in dayng ha manga nagdapa’-dapa’/ timappa sin paruntungan.
Adâpun in kaibanan simulang ha dâhan sin Assalaf assalih, salta’ dalêl akkal in biyawgbugan.
Dayng ha sabab yan, unu tu’ud in piyagbidda’an sin Aqêda sin Ahlus Sunnah wal Jamâ’a ha palihâlan sin Asma’ was Sifat, iban Aqêda sin manga tau simulang kanila ?
In kahawpu’an niya:
In biyawgbugan sin Aqêda sin Ahlus Sunah, ha palihâlan sin Asma’ was Sifat, amuna in Qur’an iban Hadêth iban pamaham sin Assalaf assâlih (Sahâbat, Tâbi’in iban Tâbi’-attâbi’ên).
قال تعالي { لَيْسَ كَمِثْلِهِ شَيْءٌ وَهُوَ السَّمِيعُ الْبَصِيرُ } سورة الشورى : 11
Hâti niya:
Parman sin Allâhu ta’âla: { wayru’un sabanding Niya unu-unu iban in Siya jukup in pangdungug iban jukup in pangita’ } [ Ash-Shura : 11 ]
Unu in hâtihan sin wayru’un sabanding?
In hâti niya wayru’un sibu’/Sali’ labi awla na tu’ud wayru’un umanggil Kaniya (Allâh) hangsulag unu-unu, iban di’ hika panghinungging pa unu-unu na.
Pangasubu:
bukun ka in Sifat, pangdungug iban pangita’, sifat sin manga biya’ kâtu’ piyapanjari?
Masi masi in sasambungan ha pangasubu yan, amun âyat nabangkil naka una salta’ dung dungan natu’ tu’ud marayaw in parman sin Tuhan, ha parman Niya: { bunnal tu’ud wayru’un sabanding Niya [sin Allâh] }, hâtihan niya tantu tu’ud wayru’un sibu/Sali’ Niya[sin Allâh] labi awla wayru’un umanggil Kaniya [ha Allâh] hangsulag unu-unu, hâti niya misan pa in ka’awnan sin manga piyapanjari Niya [sin Allâh], maka dungug iban maka kita’, malayngkan in pangdungug iban sin pangita’ nila [sin piyapanjari], di’ da magsibu’/magsali’ biya’ sin pangdungug iban pangita’ sin Allâhu ta’âla.
Mayta’ baha’?
sabab bunnal tu’ud wayru’un maka anggil iban makasibu’ ha Allâhu ta’âla misan unu-unu.
Upama niya:
Sapi’ iban ista’, sibu’ awn `O ? unu baha’ hangka papata in `O sin duwa ini? Bunnal tu’ud di’ magsibu’.
Mayta’ baha?
sabab sin awn piyabidda’an sin duwa ini, bunnal tu’ud in ka’awnan sin hambu’uk yan in siya ista’ , salta’ in hambu’uk isab yan Sapi’, dayng ha sabab yan di’ mu mapapag sibu’ in duwa yan sabab sin dugaing-dugaing in kari’asali nila.
Bunnal tu’ud Allâh in samulliya mulliya,
na bihadtu daisab in piyagbidda’an sin sifat sin Tuhan iban sifat sin piyapanjari, gammanayan labi pa dain didtu, iban bunnal tu’ud di’ hika panghinungging in sifat sin Tuhan pa êpun Niya,
Mayta’ yadtu di’ magsibu’?
Sabab in Tuhan nagsisifat sin sifat kasukup [kamâl ], malayu’ dayng ha sifat kakulang. Adâpun in piyapanjari [ makhlûk ] nagsisifat sin sifat kakulang [ Naqs ]. Dayng ha sabab yadtu di’ tu’ud hika panghinibu’ in piya panjari pa nagpapanjari.
Laung he Shaikhul Islam Ibn Taymiyyah ( rahimahullah )
نؤمن بكل ما وصف الله به نفسه ووصفه به الرسول صلي الله عليه و سـلم من غير تحريف و لا تعطيل و من غير تكييف و لا تمثيل.
Hâti niya:
Namaratsaya kami ha katân unu-unu na in piyag sifat sin Allâh ta’âla ha zat Niya , iban piyag sifat kaniya sin Rasûl Niya Muhammad (sallallahu alayhi wa sallam), ha wayru’un tahrêf[ pagpinda/pagpalling ], iban ta’têl [pagmalilu’], iban tak-yêf [pagpahantang ], iban tamthêl [pagpanghinibu’ ]. [AlAqêdah Alwasitiyyah]
Masha’Allâh, way sa lumingkat sin manga hilala’ungan ini, bang sadja dung-dungan tu’ud marayaw sin manga mânusiya’.
Dayng ha manga salaggu’ laggu’ pangadji’an makawa’ ha lilayan [ ta’rifan ] ini, amu in piyag silangan sin usulan [masdar talaki ] sin Ahlus Sunnah iban [usulan ] sin manga Ahlul Bida’. Adâpun in usulan sin Ahlus Sunnah [ Qur’ân iban Hadêth ] ampa pa urulun in akkal ha duwa ini, misan pa in ka’awnan niya mapa’it, atawa kan di’ na abutan sin akkal, masi masi gawgut in panggayung-gung ha Qur’ân iban Hadêth.
Ampa in usulan sin Ahlul Bida’ [ Akkal ] pa’unahun in akkal dayng sin [naqal ] Qur’ân iban Hadêth, hâtihan niya, unu-unu na dayng ha âyat iban Hadêth mag atap iban sin akkal nila iban ma’amu, tayma’un nila, sumagawa’ bang di’ na ka’unun sin akkal nila, na di’ na sila manayma’i, misan pa in ka’awnan sin Hadêth yan sahêh, salta’ piyag mawpakkatan sin duwa Imam
[ Bukhâri iban Muslim ].
Biya’ na kan Ibn Atiyya: in siya ini Imam dakula’ bang ha tafsêr, sumagawa’ bang ha Aqêda, in siya ini Ash’ari [ kullabi ], naglilay mayan siya sin sifat Alwajh [ bayhu’ ], in agi niya in sifat Alwajah, wajibul wujûd, laung niya, pasalan awm manga ‘ulama’ nag pituwa sin awn dalêl dayng ha samâ’ [ Qur’ân iban Hadêth ] manunjûki sifat wâjib sin Tuhan in Alwajh [ bayhu’ ].
Sumagawa’ wayru’un niya natayma’ in dalêl, mayta baha?
Parahal siya na tu’ud in namayta, sin awn dalêl dayng ha Qur’ân iban Hadêth, manunjûki sifat wâjib in sifat Alwajah. Na unu hangkan mahi niya way pa na tayma’?
Kaingatan niyu bang mayta?
In sabab hangkan siya wayru’un nanayma’i misan pa in ka’awnan kiya ingatan niya sin awn dalêl nanunjûki, ha na bangkil yadtu sabab sin di’ ka’unun sin akkal niya, iban di’ na abutan sin angan-angan niya.
In pangasubu:
Kansiyu akkal in subay tayma’un, akkal sin Ash’ari, atawa akkal sin Mu’tazili, atawa akkal sin Mujassima, atawa kan akkal sin jahmîya? Kansiyu baha’ akkal in mapatut agarun, pasalan sin nagbibidda’- bidda’ in dâhan sin manga sila nagkasabbut yan, unu in sifat isbatun [ tayma’un ] sin hambu’uk tumpukan, salta’ di’ malilu’un [ di’ tayma’un ] sin hambu’uk tumpukan! Ampa in kasabunnâlan hambu’uk da.
Jari niya nalingug in ummat, napulak kanat na, dânan dayng ha pamaham sin manga tau ini, pasalan tum tumun natu’ manga palanggungan ha agama islam, in manga kaput biyabawgbugan nila ini, sambil iyabutan sin pikilan sin kaibanan, amun nahinang tikduhanan in kufur iban êman ha wayru’n na piyagsilangan.
Laung hi ibn arabi :
Sibu’ da in pangatud ha Ka’ba iban sin Simbahan, iban sin barhala’ [pagsusumbahun], iban sin pag-i’ipatan Usa, in katan yadtu ha pangatud ku wayru’un piyag-âgan, sibu’ da, astagfirullâh! Hisiyu dayng ha manga muslim in maka ga’us papagsibu’un niya in Ka’ba iban sin barhala’ [pagsusumbahun].
Bangsadja tiyayma’ nila na in pamandu’ sin Qur’ân iban Hadêth, malingug baha’ in manga ummat ? tantu di’, sabab in Qur’an iban Hadêth [ma’sûm ] di’ magkalawng, adâpun in akkal pikilan sin mânusiya’ tantu mag kalawng. Hangkan sa in usulan [ masdar talaki ] landu’ tu’ud mahalga’, supâya mapinig mu in kasabunnâlan iban kabâtilan [ kalawngan ].
Adâpun in Aqêda sin Salaf, wayru’un pagtunggakali, salta’ maluhay hâtihun sin mânusiya’, du’un naka mala’as atawa mabata’, sibu’ da mata’as in pangadji’ atawa kulang pangadji, atawa kan sibu’ da hâlul akkal iban sin bukun, na! bunnal tu’ud in Aqêda sin Salaf maga’an iban maluhay hâtihun, iban di’ hika paghawl-hawal, salta’ bukun mahilutuk ha pamaham sin mânusiya’.
Kita’a/pandugahi niyu in luhay sin pag lilay sin Salaf ha sifat sin Tuhan , “wayru’un sumibu’ iban wayru’un ‘umanggil kaniya” unu in hâti sin wayru’un sumibu’ iban ‘umanggil ?
Hâti niya unu unu na in sumûd pa pikilan mu hatungud sin Tuhan, bunnal tu’ud in Allâh dugaing iban malayu’ ha simûd pa pikilan mu, iban bunnal tu’ud in Allâh di’ hika sabanding sin hisiyu siyu, iban di’ hika panghinunggîng ha unu-unu.
Mahuli, wayru’un na pagkuraballit iban wayru’un na pag-indalupa ginis, sawasa’ iban matarrang salta’ kahâtihan na, di’ na mag kagunahan mamakay manga Hayez, jawhar, arad atawa unu-unu na dugaing pa mustalah, amun di’ kahâtihan sin manga wala’ naka pangadji’ sin manga mustalahât ini.
Awn tau himâdir ha majilis pagpangadji hi Imam Mâlik (rahimahullâh) salta’ ampa na imasubu, iban pag iyan: `O Imam, biyaddi’in kahtang sin pag-istawa’ sin Allâhu ta’âla ha Arsh?
Laung hi Imam Mâlik (rahimahullâh): in istiwa’, ma’lum in ma’ana niya [ kahâtihan bang unu in maksud sin istawa’ ], sumagawa’ in kahantang sin pag-istiwa’, in yan majhûl [ di’ kaingatan ] di’ abutan sin pikilan sin mânusiya’, in pangasubu muyan bida’a, di’ mapatut.
Masha’Allâh, malanu’ masawa in himumungan hi Imam Mâlik(rahimahullâh) sumagawa’ awn namayan dayng ha manga mânusiya’ in masi pa di’ maka hâti, amura kuman biya’ sin sambat, in sahunit-hunit na hipa tarrang, amuna in asal na matarrang, biya’ sin tau umasubu bang biyaddi’in in dagbus sin suga, parahal yaun niya kîkita’ in suga samâta-mâta, na Biyaddi’in ka’agi maglilay kaniya sin ya’un nânga’kâ’an in suga.
Bassaha niyu man in : Lilayan sin manga Mustalahat siyabbut hi Shaikhul Islam Abil Abbas Ibn Taymiyyah ( rahimahullah ) ha gikap hika duwa .
Subhanakallahu wa bihamdik ,astagfiruka wa atubu ‘ilayk [kaffaratul majlis]
No comments:
Post a Comment