By: Abu Mardiya As-Salafiy(TL)
Sanglit iban pudji pa Allahu Ta’ala, salawat iban salam pa Rasulullah (sallallahu alayhi wa sallam)…... Mahuli;
In LASA (Love)…
Hambuuk siya palmata sahalgah-halgah piyapanjari sin Allahu Ta'ala halaum pangatayan sin manga Makhluk niya…
Hambuuk da isab siya kabuhianan sin Jantung, iban kakaun sin nyawalihan…
Hambuuk siya kabuhih amuin bang malawah ha hambuuk manusiyah timbang da siya miyamatay….
Siyana in sahaya, apabila malawah ha hambuuk manusiyah in kabuhih niya biyah da sin halaum tigidlum bitu-bituhan…
Siyana in ubat, apabila malawah ha hambuuk manusiyah maluhay siya tapuan sin sakit…
Siyana in parasahan masantap, mahayang, amuin apabila dih mahasil sin hambuuk manusiyah in kahalan sin kabuhih niya ha Dunya ini halaum sadja sumlut iban karukkaan,
Lilinga iban tandinga in kalangit-langitan, katumbu-tumbuhan, kabinatang-binatangan, ubus ampa mu papagtumbang balika in pangatud mu pa katan piyapanjari, ampa mu dung-dungi marayaw in ginhawa baran mu….. tantu na sadja kabakan mu in ikaw….
piyapanjari sin Mahasutsi Allah ha sarayaw-rayaw umbang payaw..
iyanugharaan kaw Nihmat iban Rahmat dih maghupay…
piyapag haddam kaymu in manga piyapanjari halaum sin gumi ini…
piyalabi in kalabbiyan mu dain ha katan a-lam…
tanuman halaum bigi jantung mu iban ha akkal mu in pagparatsaya iban pagma'arifat hakatunggal sin Allah Maha assa iban paratsayaha in kabasaran sin nagpapanjari kaymu, Tuhan salagguh-lagguh, maupaya, Mulliyah, Kawasa, Limaya, Tuhan amuin nagpanduh kaymu dain hakatigidluman pa dan mabuntul iban masawa..
In pamaratsaya iban ma'arifat pa Tuhan, amuna in mangdahi ha iypun lumasa pa tag-iypun..
In pamaratsaya (iyman) iban lasa (mahabbah) in duwa ini nag-aabay atawa kan nagmimislah, biyah da sin pagmislah sin Jasad iban sin Nyawa….
unu bahah in kapusan sin Jasad bang wayna in Nyawa? Damikkiyan, unu bahah isab in kapusan sin iyman bang way Lasa….???
Apabila kahatihan sin hambuuk iypun bang hisiyu in Tuhan niya tartantu lumasa na siya pa Tuhan, apabila siya lumasa pa Tuhan tartantu tumaalluk na in pangatayan niya pa katan paldaakan sin Tuhan, iban muntul na in pag-agama niya ha Shara' piyaturun sin Allahu Ta'ala, iban in katan ammal ibadat niya ihlas na sadja ha karnah sin Allah.. duun ha ini; kananaman na sin hambuuk iypun in mattan limuh sin pag-iyman ( The sweetness of faith)..
:((ثلاث من كُنَّ فيه ، وجد بهن حلاوة الإيمان : أن يكون الله ورسوله أحبَّ إليه مما سواهما ، وأن يُحبَّ المرء لا يحبه إلا لله ، وأن يكره أن يعود في الكفر ، بعد إذ أنقذه الله منه ، كما يكره أن يُلقى في النار)) .[متفق عليه]
"TUW PARAKALAH HISIYU SIYU IN AWN DUUN KANIYA IN TUW INI TANTU KANANAMAN NIYA DUUN IN MATTAN LIMUH SIN IYMAN;
(1) - HIKA-ISA; APABILA IN KAAWNAN SIN ALLAHU TA'ALA IBAN RASUL NIYA LABI KALASAHAN NIYA DAIN HA KATAN KALALASAHAN NIYA.
(2) - HIKA DUWA; APABILA LUMASA IN HANGKATAU HA IN LASA NIYA KARNAH SIN ALLAHU TA'ALA.
(3) -HIKA TUW; APABILA SIYA MABUNGSI MAGBALIK PA KAKUPULAN PUAS SIN KALAPPAS KANIYA SIN ALLAHU TA'ALA BIYAH SIN BUNGSI NIYA PA HITILAKBUH SIYA PA NARKAH" [Piyag ittipakan hi Bukhari kay Muslim hadith dain kan Anas (r.a.)]
Nah, apabila kahatihan sin iypun in mattan ma’arifa iban kananaman niya in mattan limuh sin iyman tantu wayna makasagaw kaniya dugaing dain sin magpatisuuk na sadja pa kalasahan niya (Allah).
((لا يزال عبدي يتقرب إلي بالنوافل حتى أحبه ، فإذا أحببته كنت سمعه الذي يسمع به ، وبصره الذي يبصر به ، ويده التي يبطش بها ورجله التي يمشي بها ، ولئن سألني لأُعطينه ، ولئن استعاذني لأُعيذنه)) ]بخاري[
“MASI-MASI IN IYPUN KU NAGPAPATISUUK (NAG IIBADAT) KAKUH HA PAGHINANG NIYA SIN KASUNNAT SUNNATAN SAHINGGA LASAHUN KU SIYA, APABILA KU SIYA KALASAHAN NAH AKU NA IN PANGDUNGUG AMUIN HIPANGDUNGUG NIYA, IBAN AKU NA IN PANGITAH AMUIN HIPANGITAH NIYA, IBAN AKU NA IN LIMA NIYA AMUIN HIBANTANG NIYA (PAKAYUN) IBAN AKU NA IN SIKI NIYA AMUIN HIPAMANAW NIYA, IBAN BANG SIYA MANGAYUH KAKUH HIDUL KU KANIYA IN PANGAYUH NIYA, IBAN BANG SIYA MAGPATILIBUN KAKUH (DAIN HAKAMUMULAHAN IBAN SASAT SHAYTAN) TANTU LIBUNAN KU SIYA (PALIHARAUN) [Bukhari]
Bang in lasa pa Allahu Ta’ala amuna in gamut (puunan); ampa in sanga niya amuna in lasa pa Rasulullah (saw), in lasa pa Rasulullah (saw) amuna in samata-mata pagta’at kaniya, ampa in pagta’at kaniya amuna in pagta’at pa Allahu Ta’ala, Palman sin Allah;
من يطع الرسول فقد أطاع الله
“HISIYU SIYU IN MAGTA’AT (KUMAHAGAD HA RASULULLAH (SAW) SABUNNAL TUUD NAGTA’AT NA SIYA PA ALLAHU TA’ALA” [Surah An-Nisa’: 80 ]
Mataud manusiyah nagdaraawa malasa pa Tuhan nila Rabbul A-lamiin, iban malasa pa Rasulullah (saw). Sagawah, tubtub da ha higad simud nila way kakitaan mu tandah ha kakahinang nila, gamna mayan limurup na sila palaum tawid sin hawa nafsu nila, himaha’gum halaum kakahinang amuin way nahinang iban bukun pangdaakan sin sarayaw-rayaw suntuan Muhammad (saw).
Bang mu pasaran in manusiyah halaum daawa nila tantu in nagbabadjuh dagmay magdaawa sin in siya nagbabadjuh sutrah, in lihadu amuin way misan hambuuk kusing (pisita) magdaawa sin siyana in dayahan halaum gumi ini, sampay in sapik pingkul agun-agun dumaawa sin kagausan niya tukuhun in langit…
Pagka in manusiyah madaawa, siyukat kanila sin Allahu Ta’ala bang bunnal da in daawa nila, Palman sin Mahasutsi Allah;
قُلْ إِنْ كُنْتُمْ تُحِبُّونَ اللّهَ فَاتَّبِعُونِي يُحْبِبْكُمُ اللَّهُ ويَغْفِر لَكُمْ ذُنُوْبَكُمْ وَاللَّهُ غَفُورٌ رَحِيمٌ
“PAMUNGAN KANILA (O MUHAMMAD), BANG IN KAAWNAN NIYU MALASA PA ALLAHU TA’ALA NAH, AGAD KAMU KAKUH (HA PAMANDUH AMUIN PIYATURUN KAKUH SIN TUHAN KU), (TANTU TUUD BANG KAMU MAGAD HA PAMANDUH KU IBAN KAKAHINANG KU) KALASAHAN KAMU SIN ALLAHU TA’ALA, IBAN AMPUNUN NIYA IN PALDUSAHAN NIYU, IN ALLAHU TA’ALA SANGAT MANGANGAMPUN IBAN BAING ULUNGUN” [Surah Al-imran: 31 ]
In bunnal LASA pa Allahu Ta’ala amuna in tumundan, magmalulus iban magpatikupuh ha katan naparatung pa Rasulullah (saw), in bunnal LASA pa Rasulullah (saw) amuna in umupi ha kakahinang niya iban lumayuh dain ha kakahinang bahgu amuin bukun pardaakan niya..
In manga Yahudi (Jews) iban Nasara (Christian) nagdaawa sila sin silana kunuh in anak iban kakasihan sin Allahu Ta’ala, nah! siyambag sin Allahu Ta’ala in daawa nila ha Palman niya:
(قل فلم يعذبكم بذنوبكم )
“PAMUNGAN KANILA (O MUHAMMAD): MAYTAH KAMU SIKSAH SIN ALLAHU TA’ALA SIN DUSA NIYU? (Bang kamu mattan kalasahan sin Tuhan maytah kamu siksah niya? Ampa in mattan kalasahan sin Allahu Ta’ala amura in nagtata’at miyamagad ha Sharah piyanaug niya. [Surah Al-Maedah: 18]
Laung hi Imam Shafiiy (Rahimahullah) ha ayat ini:
أن الله لا يعذب أحبابه .
“SABUNNAL TUUD DIH SIKSAUN SIN ALLAHU TA’ALA IN TAU KAKASIHAN NIYA”
Bunnal da bahah in LASA mu pa Allahu Ta’ala…..??
Bunnal da bahah in LASA mu pa Rasulullah…??
Bang bunnal in LASA mu pa Allah iban pa Rasulullah timundan, nagmalulus iban nagpatikupuh da bahah kaw ha sharah niya..?
Wayra bahah kaw nagdaawa sadja malasa pa Allah iban pa Rasulullah…?
Dunguga in wasihat sin manga Salaf As-Salih (Rahimahumullah), yari in mattan malasa pa Allahu Ta’ala iban pa Rasulullah (saw) sartah yari in sabuntul-buntul dan amuin hikalappas kaymu dain hakalaungan…
Laung hi Hudhayfa ibn Yamaan (r.a.) “IN KATAN IBADAT AMUIN WAY NAHINANG SIN SAHABAT SIN RASUL (SAW) AYAW NIYU HINANGA” (Baytah hi ibn Battah ha Al-Ibanah)
Laung hi Abdullah ibn Umar (r.a.): “MASI-MASI IN MANUSIYAH (MUSLIM) HA DAN PAMANDUH SIN RASULULLAH (SAW) SALUGAY NILA MIYAMAGAD HA ATHAR (Qur’an iban Hadith)” (Sharh usuol I’tikad ahlus sunnah wal jama’a)
Laung hi Imam Al-Awza’iy (r.h.): “IBUT ULIN KAW HA BAUGBUG SIN SALAF MISAN PAKAW BULAWUN SIN MANUSIYAH, IBAN HALLIH KAW HA PAPANAW PIKILAN PIKILAN SADJA SIN TAU MAINGAT MISAN PA ARI-ARIHAN NIYA KAYMU SIN SALINGKAT-LINGKAT HIMUMUNGAN” (Baytah hi Al-Khatib)
Laung hi Ayyub As-Sikhtiyaaniy (r.h.): “BANG MASI-MASI IN AHLUL BID’AH NAGMAMATUYUH SIN KAKAHINANG NIYA, MASI-MASIRA ISAB SIYA MAGLALAYUH DAIN HA ALLAHU TA’ALA” (baytah hi Ibn Wadh-dhaah)
Laung hi Imam Malik (r.a): “IN SUNNAH BIYAH SIN ADJUNG (BAHITRAH) HI NABIULLAH NUH, HISIYU SIYU IN SUMAKAT PA TAAS TANTU MALAPPAS SIYA, IBAN HISIYU SIYU IN MAGPABIN (DIH SUMAKAT) TANTU MALUMUS SIYA” (Baytah hi Imam Suyutiy)
Laung hi Imam Ahmad ibn Hanbal (r.a.): “IN USUOL SIN AHLUS SUNNAH HA PANGATUD NAMUH; AMUNA IN MAMAUGBUG HA UNU-UNUNA IN BIYAUGBUGAN SIN SAHABAT SIN RASULULLAH (SAW), IBAN UMUPI SIN KAKAHINANG NILA, IBAN TUMINGGAL ATAWA UMANIB SIN HINANG BID’AH, KARNAH IN KATAN BID’AH DALAALAH (LAUNG). (Sharh Usuol Ahlus sunnah).
O kaw nagdaraawa malasa pa Allahu Ta’ala…!!
Pasandunga ha pikilan mu in sakaula-ula didtu kaw ha arafah nakahadir ha manga Sahabat sin Rasul (saw) ha waktu timurun kanila in ayat ini;
الْيَوْمَ أَكْمَلْتُ لَكُمْ دِينَكُمْ وَأَتْمَمْتُ عَلَيْكُمْ نِعْمَتِي وَرَضِيتُ لَكُمُ الإِسْلاَمَ دِينًا
“HA ADLAW INI SIYAMPULNAH KUNA KANIYU IN (BABARAPA HUKUMAN SIN) AGAMA NIYU, IBAN JIYUKUP KUNA KANIYU IN NIHMAT KU IBAN PAGRIDAH (PIYANGHINUGUT) KUNA KANIYU IN AGAMA ISLAM PAG-AGAMAHAN NIYU” [Al-Maedah:3]
O kaw nagdaraawa malasa pa Rasulullah…!!
Pasandunga ha pikilan mu in sakaula-ula didtu kaw ha hadarat sin Rasulullah (saw) ha waktu siya halaum najah sakaratal maut…. In tubig mata sin Sahabat niya nabiyah dabak-dabak nagkaligid dain ha mata nila… nagmasusa karnah bang tumaykud na in Rasulullah (saw) dain ha dunya biyah diin na bahah in kahalan sin Ummat huling jaman..!! iban bang biyah diin na in hikasampay kanila sin aqeedah malihaw..!!
Pasandunga O kaw nagdaraawa malasa pa Rasulullah..!! ha waktu halaum najah sakaratal maut in Rasulullah (saw) dih niyana hikasuwara in wasihat niya kaymu.. duwal dakuman dilah niya iban higad simud niya in magkubbut-kubbut… pasandunga in suwara sin Nabi pilihan.. suwara mahanunut iban hipus, tiyataynghugan sin taynga sin manga sahabat niya mulliya.. suwara hipuh sin Rahmat iban pamanduh… suwara paminmin ha kalasahan niya… suwara hinapusanna kadungugan di ha dunya…!! Unu in hinapusan suwara sin Jungjungan Rasulullah..???
UMMATI….. UMMATI…. UMMATI…
O kaw kakasi sin Allah iban sin Rasulullah…!! Taynghugi in salagguh lagguh pusakah kaymu sin kakasi mu Rasulullah.. ayaw mu pag-gantian ha halgah dunya tiyuh-tiyuh… gayung-gungi tuud, parayawa in kabaugbug mu, bang mu yan biyutawanan tantu magmula nakaw…
تركت فيكم أمرين لن تضلوا ما تمسكتم بهما كتاب الله وسنة رسوله
“HIBIN KU KANIYU IN DUWA PARAKALAH INI, BANG NIYU BAUGBUGAN MARAYAW TANTU DIHNA KAMU MALAUNG SALAMA-LAMA, AMUNA IN KITAB SIN ALLAH (QUR’AN) IBAN SIN SUNNAT SIN RASULULLAH” [baytah hi Imam Malik ha kitab niya Al-Muwatta'a]
Ibut ayaw mu saimbugi in aqeedah mu sin luggiyah akkal pikilan (logic and philosophy), hallih kaw ha pakaradjaan bahgu (bid’ah)…Ulini mahugut in Qur’an sin Allah… ulini mahugut in Sunnat sin Rasulullah.. tundan kaw ha papanaw sin salaf as-salih amuini in salihaw-lihaw panawheed (aqeedah), iban amuyan in TRUE LOVE…
